Leikurin “Upphav” sýndur í Kvívíkar skúla
Vælvitjaði og nógv rósti einkonuleikurin Upphav fer á rundferð kring alt landið í vár og 25. mars verður leikurin sýndur í Kvívíkar skúla. Leikurin byrjar klokkan 20:00
Brot úr tíðindaskrivi um leikin:
Vælvitjaði og nógv rósti einkonuleikurin Upphav fer á rundferð kring alt landið í vár.
Einrøðuleikurin eftir Gunnvá Zachariasen og Maritu S. Dalsgaard hevði frumframførslu í Norðurlandahúsinum í heyst og spældi har í góða viku. Útselt til allar sýningarnar.
Ummælini vóru serdeilis góð, og fleiri áskoðarar løgdu hugleiðingar, tankar og viðmæli á sosialar miðlar aftan á leiklok, umframt í práti eftir sýningarnar. Leikurin rørdi tey. Her var ein leikur úr okkara egna jørðildi, um okkara egnu søgu og samleika úr eini ikki so fjarari fortíð, tá náttúran setti sína ófrávíkiligu treyt fyri lívsgrundarlagið úti í Hesti eins væl og øðrum bygdum í Føroyum.
Upphav er um skaðadagin, sum rakti Hest 1. apríl 1919, tá tveir útróðrabátar ganga burtur, og ellivu menn sjólátast.
Upphav fortelur okkum søguna um gerandislív og kor í Hesti hetta tíðarskeiðið – søguna um menn, kvinnur og børn, sum sorgbitin fóta sær eftir syndarligu bátsvanlukkurnar. Upphav er um ommu Gunnvá Zachariasen, Óluvu, sum misti pápa sín hendan vanlukkudagin, 6 ára gomul.
Við hesi søgu vilja TVAZZ og Leikhús SKIFT fagna okkara formøðrum og í takksemi seta ein minnisvarða fyri teimum.
Onnur tíðindi
Veljarar, ið verða burturstaddir valdagin, ella á annan hátt lúka treytirnar fyri at greiða brævatkvøðu, kunnu frá í dag, 27. februar 2026 og í seinasta lagi mikudagin 25. mars 2026 greiða brævatkvøðu við at venda sær til kommunuskrivstovuna.